- Inntektsløft viktigare enn distriktsprofilen

Regjeringa seier dei i framtida vil overføre meir midler frå nasjonale til regionale program på landbruks- og matområdet. Kjell A. Sølverød, leiar i Telemark Bondelag, er glad for tiltaket, men han tviler på om dette er nok til å bremse utviklinga i Telemark og andre utsette område.

- Det er bra med meir handlingsrom regionalt. Denne biten blir jo rekna som byråkratisk og tung, og ei omdisponering kan gje meir rasjonelle løysingar for bruk av desse midla, seier Sølverød.

Han finn mykje bra i meldinga, men meiner ho er for lite konkret med gode tiltak for å auke matproduksjonen.

Kampen om dei unge

- Korleis skal ein få fleire unge til å satsa på landbruk i Telemark og andre stader?

- Betre økonomi er sentralt, bonden må tene pengar for å auke statusen og motivere fleire unge til å satse. I tillegg kan eit eige fagbrev auke statusen til yrket. Derfor er det viktig å få til ei utdanning innafor naturbruk som også gjev fagbrev, seier han.

Utdanninga til agronom og gartnar er i dag den einaste yrkesløpet innafor utdanningsprogrammet naturbruk som blir avslutta med vitnemål eller kompetansebevis, og ikkje med fagbrev.

Men landbruksnæringa og Bondelaget må ta litt sjølvkritikk på dette, meiner fylkesleiaren i Telemark.

- Vi har ikkje vore flinke nok til å fornye oss, men no har det skjedd mykje positivt. Søve vidaregåande skule, den einaste skulen som tilbyr naturbruk i Telemark, er styrka og det skal halde fram. Skulen skal vere eit kompetansesenter for landbruk i heile fylket, og har også agronomkurs som er tilpassa vaksne som ønskjer kunnskap om landbruk og formell kompetanse som agronom.

Vil redusere odelskrinsen

Fylkesleiaren i Telemark skulle gjerne sett fleire klare verkemiddel i den nye landbruksmeldinga, også når det gjeld distriktsprofil og rekruttering til næringa.

- Det er vanskeleg å komme med heilt konkrete forslag til verkemiddel på ståande fot, men eg synest det er svært positivt at regjeringa foreslår å innskrenke odelskrinsen i odelslova. Dette kan vere eit viktig tiltak for å få fleire unge inn i landbruket, seier han.

I dag kan odelsberettiga med fjern tilknyting til eigedomen krevje eigedomen løyst på odel når familien vel å selje han utanfor odelskrinsen.

- Regjeringa føreslår å fjerne kravet om å hauste avlinga for å få utbetalt kulturlandskapstilskotet. Kva synest du om det?

- Omgrepet å styrke den aktive bonden tilseier at kravet til hausting for å mota kulturlandskapstilskot må vidareførast, i motsett fall vil jordleigedelen auka enno meir, med andre ord at vi svekker den aktive bonden.

Eige landbruksmelding

Fylkesutvalet i Telemark har vedteke å starte arbeidet med ei eiga landbruksmelding for Telemark. Arbeidet skal starte no i januar, og etter planen leggjast fram for behandling i fylkestinget i oktober 2013.

- Det er positivt at Fylkesutvalet har gått inn for dette, og mange er med på laget. Planen er å samle kreftene og få fram moglegheiter og legge til rette for tiltak for landbruksnæringa i heile Telemark, seier Kjell A. Sølverød.

Les også: Brekk: Meldinga bør under juletreet