Ber om utvida bjørnekvote snarast

Bakgrunnen er at nemnda på førre møtet fastsette denne kvota til fire dyr. Det vart i saksgangen opplyst at nemnda kunne utvida denne kvota dersom skadeomfanget vart omfattande.

«Våren og starten av beitesesongen 2011 har fortona seg som eit endelaust mareritt grunna bjørn. Det har vorte gjeve fleire skadefellingsløyve, både av DN og nå i det siste av FM i Oppland. Som kjent har det òg vorte 2 vellykka skadefellingar. Det er mens dette brevet vert skrive sett i verk 2 skadefellingsløyve, 1 i Vang og 1 i Ringebu/Øyer. På same tid er det funne fleire dokumenterte/antatt skader av bjørn på båe sider av dalen i Sør-Fron og no sist på vestsida i Ringebu. Det verserar no sitat på at skadefellingsløyve ikkje vert gjeve fordi det ikkje vert funne mange nok kadaver eller at ikkje FM i Oppland har fleire løyve å gje ut. Dette må straks innskjerpast og gjerast noko med», står det i brevet.

«Beitenæringa kan ikkje leva med at bestanden av og skadane av bjørn i Oppland aukar grunna at Rovviltnemnda ikkje har vedteke stor nok skadefellingskvote, og krev at denne kvota straks vert auka frå 4 til 8 dyr», heiter det vidare.

- Det er veldig trist det som har skjedd i fylket vårt i vår. Eg kan ikkje svare konkret på dette brevet no, men vi skal ha eit nytt møte i Rovviltnemda i neste veke og her kjem vi til å drøfte dette innspelet. Men vi må ta hensyn til alle høyringskommentarane som kjem inn, og ein ny forvaltningsplan er ikkje klar før langt ut på hausten, seier leiar for Rovviltnemda i Oppland, Reidun Gravdahl.

Ho skryt av beitenæringa i Oppland og forstår godt at mange sauebønder er fortvila.

- Det er svært mange sauebønder som er med i beitelag, og mange gode tiltak er starta opp. Vi veit at dette er tida for bjørn, men denne våren har det vore verre enn nokon gang. Det har resultert i at to bjørnar er felt. I dei snart fire åra eg har vore leiar i Rovviltnemda har det vore ein auke i bjørneskader. I fjor hadde vi òg mykje plager med jerv, og den fyrste meldinga om jerveskade er akkurat komen inn no, seier Gravdahl.

Les også: Søye teken av bjørn i Gausdal