- Talerøyr for pelsdyraktivistane

På årsmøtet i Norges Pelsdyralslag opplyste Skadsem at laget har sendt klage på NRK til Pressens Faglige Utvalg.

Pelsdyrnæringa har også det siste året vore utsett for eit hardt mediekjør, men resten av medie-Norge har ikkje vore som NRK sentralt, held Skadsem fram. Lokale NRK-avdelingar har vore meir balanserte i høve til pelsdyrnæringa, det same gjeld lokalaviser - medan NRK sentralt har vore veldig einsidige i si framstilling av næringa.

- Næringa har og skal ha ei framtid i Norge, slår Skadsem fast. Landsmøtevedtaket i Arbeidarpartiet om styrt avvikling av pelsdyrnæringa var likevel eit alvorleg nederlag for norsk pelsdyrnæring.

- Me tapte fyrst og fremst på grunn av NRK, som har late seg bruka av aktivistane. Statskanalen og lisenskanalen NRK sitt krosstog mot pelsdyrnæringa må no få ein slutt, seier Bertran Trane Skadsem.

Ei dobling innan ti år

- Det Norske Arbeidarpartiet har ein kultur som skal skapa arbeidsplassar, ikkje byggja ned ei heil næring, slår Skadsem fast.

I samband med den komande landbruksmeldinga, har Norges Pelsdyralslag ei dobling av produksjonen innan ti år som målsetnad.

Det pågår ein kamp i regjeringa no om kva som skal stå i landbruksmeldinga om pelsdyr. Me får stola på landbruks- og matminister Lars Peder Brekk og Senterpartiet, og mindretalet i Ap, sa Bertran Trane Skadsem i talen sin til årsmøtet.

For øvrig er både Høgre, KrF, Frp og Sp er positive til næringa.

Har ei framtid

- Samtidig med det politiske arbeidet må me overtyda oppdrettarane om at næringa har ei framtid. Me må få rammevilkår som gjer det muleg å konkurrera med land det er naturleg å samanlikna oss med. For mink gjeld dette Danmark og for rev gjeld det Finland.

Produksjonen i Norge har falle både for mink og rev. Me har no om lag 160.000 revar og 600.000 minkar i Norge.

- Produksjonsauke er difor viktig, slo Skadsem fast.

I år har det vore historisk høge prisar i pelsdyrmarknaden. For blårev har prisen hatt ei tredobling på tre år, sylvrev har hatt ei dobling, og mink nær ei dobling i løpet av tre år.

Alle marknader ser bra ut, produksjonen av pels held seg stabilt og pels held seg i motebiletet.

Dyrevelferd

Norges Pelsdyralslag har satsa mykje på dyrevelferd, og dette vil vera eit satsingsområde også i framtida. No er det på gang ei sertifisering av alle farmar, som skal vera gjennomført i løpet av 2011.

Det vil òg bli etablert ei helseteneste med pålegg om fire årlege besøk av veterinær.

Ny forskrift for hold av pelsdyr blei gjort gjeldande frå 1. mai 2011, og Skadsem oppmoda på årsmøtet alle oppdrettarar til å tilpassa seg denne.

Bertran Trane Skadsem tok også for seg Mattilsynet, som er ein nøkkelaktør når det gjeld å dokumentera at dyrevelferda i Norge er akseptabel.

- Mattilsynet har ein jobb å gjera når det gjeld å styrkja truverdigheita hjå politikarar og folket. Mattilsynet skal vera sanningsvitne, ikkje aktivist. Dei bør koma på uanmelde besøk på norske gardsbruk. Dette er ikkje populært, men nødvendig, framheldt Skadsem.

Aldri vore på ein farm

Leiar i Rogaland Pelsdyrfôrlag, Per Haugstad, kunne fortelja at det fanst representantar på Ap sitt landsmøte som røysta for avvikling av pelsdyrnæringa, som aldri har vore i ein pelsdyfarm.

Vedkomande sa i ettertid at ho ikkje ville ha røysta slik ho gjorde, dersom ho hadde visst det ho veit i dag.

Sigbjørn Kirkebøen frå Valdres og Hallingdal Pelsdyralslag meinte at ein ikkje berre kan skulda på NRK for vedtaket i Ap.

- Me må også skulda på oss sjølve for å ha vore for dårlege til å koma med god informasjon om næringa. Me er for lite på banen. Me må gå inn for å få betre kontakt med media, for å vinna fram med fakta. Eg vil oppmoda til å søkja hjelp frå andre land i Norden, der Danmark er mest offensiv til å møta situasjonar som pelsdyrnæringa har kome opp i slik som sist haust - og me må få snudd opinionen. Me må bli betre til å få ut informasjon til politikarane, og få dei til å besøkja pelsdyrfarmar, sa Kirkebøen.

Kampen er ikkje tapt

Bertran Trane Skadsem er samd i at ein ikkje har vore flinke nok med informasjonsarbeid.

- Men me har gjort det me til ei kvar tid har funne riktig. Og kampen er ikkje tapt. Det politiske arbeidet blir prioritet nr 1 framover. Me kan ikkje leva med eit Ap som er imot oss. Me jobbar med ein strategiplan der Ap sitt landsmøte i 2013 er målet. Partiet vedtek då eit nytt partiprogram, og her skal dei vera positive eller nøytrale til norsk pelsdyrnæring, sa Skadsem.

- Samtidig må me ta vare på det fleirtalet me har på Stortinget. Det blir ein hard kamp, men ei samla næring må motiverast til å delta. Våre vener i landbruks-Norge og elles må stå fram og støtta oss. Omkampen har starta!

Høgre støttar pelsdyrnæringa på lik linje med landbruket for øvrig, ifylgje Svein Flåtten, medlem av Stortingets næringskomite.

- Det står i vårt program at me støttar næringa. Dette er ei lovleg næring, noko som er grunntanken hjå oss, sa Flåtten.

- Eg trur mange let seg riva med av kjensler, når det kjem bloddryppande bilete på skjermen. Dei ser ikkje at dei aller fleste bønder fylgjer forskriftene for husdyrhald. Me må forstå at dyr kan få skader og at dei må leva med desse ei stund etter behandling, framheldt Svein Flåtten, som understreka at Høgre ikkje kjem til å endra sitt program.

Flåtten sa seg forundra over at ei regjering ikkje samarbeider for felles haldning på dette området.

Han minna dessutan om at eit landsmøtevedtak ikkje er det same som programvedtak. Det er partia sine program som tel når det er stortingsval.

- Eg trur ikkje Ap sitt lansmøtevedtak vil endra på noko i regjeringa sitt program. Det blir berre hausa opp der og då.

- Og, det er svært viktig kva næringa sjølv gjer. Ikkje lat dykk skrema av ein resolusjon på eit landsmøte, men jobb vidare mot politkarane, vis kor bra de driv. Ta kontakt med dei lokale politikarane og syt for at ikkje dei krefter som vil ha dykk fjerna vinn. Og de må sjølvsagt syta for god og forsvarleg drift i høve til dyrevelferda, noko som gjeld alle dyreslag. Det veit eg de har, men kunsten er å overbevisa dei som ikkje ser det, understreka stortingsrepresentant Svein Flåtten.

Attvalt som leiar

Bertran Trane Skadsem frå Klepp på Jæren blei attvalt som leiar i Norges Pelsdyralslag, med Mikal Kvaal frå Melhus i Sør-Trøndelag som nestleiar. Nytt styremedlem for to år er Bjørnar Berg frå Byneset i Trondheim. Han kom inn etter Finn Årdal som ikkje ynskte attval. Trond Sørum frå Ringsaker i Hedmark blei attvalt for to nye år. Jørand Ø. Lunde frå Vang i Valdres var ikkje på val i år.