To nye damer innstilt til Nortura-styret

Jofrid Torland Mjåtveit er innstilt for ein periode på to år, og vil erstatta Birte Usland som etter fire år i styret no vel å trekkja seg ut.

Elisabeth Hoff Aarstad er innstilt for eitt år. Dette er et suppleringsval for Eli Blakstad, som trekte seg frå styret i fjor haust. Fyrste vararepresentant i styret, Bente Roer, har møtt fast i hennar plass.

Jofrid Torland Mjåtveit (44) kjem frå Nærbø på Jæren og er leiar i Nærbø Bondelag. Ho driv med mjølke- og storfekjøtproduksjon.

- Det skal verta ei spanande og interessant utfordring, dersom eg kjem inn i Nortura-styret, seier Jofrid Torland Mjåtveit, som Bondebladet møtte på årsmøtet i Rogaland Bondelag.

Elisabeth Hoff Aarstad (bildet) er 47 år og kjem frå Skarnes i Hedmark. Ho driv svineproduksjon med kombinertbesetning.

- Nortura står framleis overfor store økonomiske utfordringar, og det har difor vore eit mål for valkomiteen å finna nye styremedlemmar med god økonomiforståing. Det meiner vi å ha oppfylt med desse to kandidatane. Dersom årsmøtet vel å fylgja vår innstilling, så klarer vi også å oppretthalda kvinneandelen i styret på over 40 prosent, og det er vi glade for, seier leiar i valkomiteen, Severin Kluken.

Elles er fylgjande styremedlemmar på val i år: Lars Petter Bartnes, Steinkjer, Nord-Trøndelag, Kjersti Hoff, Løten i Hedmark og Kari Redse Håskjold, Volda på Sunnmøre. Valkomiteen føreslår attval på alle tre.

Sveinung Svebestad frå Sandnes vert føreslått attvald som leiar i Nortura.

Nestleiar i styret vert vald blant styremedlemmane for eitt år om gongen. Valkomiteen føreslår attval på sitjande nestleiar Einar Høstbjør frå Sarpsborg. Gabriel Joa frå Sola og Aud Borge frå Sande i Vestfold, som høvesvis ordførar og varaordførar, vert også innstilt til eit nytt år i same posisjonar.