Heilt hus av heil ved

Huset er på 15 kvadratmeter og bygd opp av vedkubbar. Det er bygd av tilsette knytte til attføringsbedrifta Meskano, som er eigd av kommunane Tynset, Os, Tolga, Rendalen, Alvdal og Folldal.

Veggane er stabla med to lag bjørkeved på til saman 60 cm. Det er også laga eit skjelett av reisverk, og taket er av tre.

- Det er eit utstillingshus, og eit blikkfang for utsalg frå Meskano-butikken vår. Vi er ein stor vedprodusent, og samtidig var det ein idé for å setje dei på tiltaket på ein litt anna jobb, seier dagleg leiar i Meskano, Odd Uglem, til aftenposten.no.

11 kubikkmeter ved gjekk med til huset, som blei sete opp på eit par veker. No vil Meskano gjerne gå vidare med ideen.

- Det er førebels på idéstadiet, men vi undersøker om vi kan setje opp eit tilsvarande bygg med eit sekskanta skjelett, prefabrikkert og for sal. Så kan ein stable for eksempel fire av veggane med ved, og setje inn hagemøblar, og slik få ein lun utekrok i hagen. Og så kan ein bruke veden etter behov og stable opp veggane på nytt. Dette må jo vere ein god idé for hytte- og bustadeigarar, seier leiaren i Meskano.

BJØRKEPANEL: Veggane er stabla med to lag bjørkeved på til saman 60 cm. (Foto: Odd Uglem)

Meskano driv også kulturkafeen i Tynset rådhus og tar ulike cateringoppdrag. I tillegg har dei keramikk- og tekstilproduksjon med eige butikkutsal. På snekkerverkstaden produserer Meskano blant anna kjøkken- og badinnredningar etter mål, i tillegg til andre produkt.