Skiskreddar kåra til årets Askeladd

Endre Hals (30) måtte til ein låve på Oppdal for å lage det han lette etter; skreddarsydde frikjøringsski. Her driv han i dag firmaet Prog Skis.

- Med sin produksjon av sportskunst er Endre Hals med å setje bygde-Norge på verdskartet, heiter det i juryens grunngjevnad.

Det er Norges Bondelag og Landkreditt som deler ut Askeladdprisen, ein pris på 30.000 kroner som går til ungdom som har utvist kreativitet og pågangsmot i etablering av ny næringsverksemd i bygdene.

Skandinaviske tresortar

- Årets vinnar er ein «skreddar» frå Molde, men ikkje i ordets rette forstand, sa juryleiar Nils T. Bjørke då han delte ut prisen saman med styreleiar Knut Nordmo i Landkreditt.

- Hans verktøy er ikkje nål og trå, men ein fres og skandinaviske tresortar. Verkstaden er ein låve på småbruket Øverlønset i Oppdal. Her skreddarsyr Endre Hals frikjøringsski etter mål, som einaste produsent i verda. Gammal og ny tid møtest når prisvinnaren gjennom sin entusiasme og lidenskap viser at det er muleg å skape utradisjonelle arbeidsplassar i distrikta, sa Nils Bjørke.

Endre Hals lagar ski på bestilling - og kvart par er unikt. Skia vert tilpassa eigaren etter alder, høgd, vekt og kjørestil - og snøtypen som skia skal brukast på.

Hundre ski i året

Prisvinnaren har utdanning frå Arkitektur- og designhøgskolen i Oslo. Basert på informasjon om kjøparen, vert trekjernen til skia fresa ut, stålkantar bøygde til og skisåle skoren ut. Til slutt vert alt saman lagt i ei 30 tonns formpresse, der skia formast over natta. Kvart skipar får namn og dåpsattest.

Hals har brukt seks år på testing, reseach og prøving, før han begynte å selje ski. Han reknar med å lage hundre par ski i år.

Prog Skis har to tilsette, Endre Hals og sambuaren Elisabeth Flotve.