Dronninga gjesta Bondens marked

Dronningbesøket i Førde var eit ledd i opninga av den internasjonale folkemusikkfestivalen i sunnfjordshovudstaden. Leiar Aud Slettehaug i Bondens marked i Førde er glad for den merksemda dette gjev matspesialitetane.

- Vi det som eit svært viktig signal at kongehuset valde ut å ta med denne arenaen i programmet mellom alle tilboda under festivalen, seier ho til Bondebladet.

Stoppen vara lengre enn planlagd i programmet, noko Slettehaug tolkar som eit positivt teikn på at dronninga likte seg. Ho og fylgjet hennar fekk sitte ned og smake på ein meny med eit allsidig utval av produkt frå fylket, mellom anna dronningsyltetøy (!) frå Kroken Frukt og Bær i  Skjolden.

På menyen stod òg lefserull med laks frå Åsnes fiskeprodukt, Straumsnes, spekekjøtt av geit frå Kandal Kjøtt, Sandane, natronkake frå Botnatunet Gardsmat, Førde, jordbær frå Per Huge, Skjolden, rabarbrasaft  frå Kroken Frukt og Bær, Skjolden, ekte brun geitost frå Kaldakari ost, Veitastrond og Sunnfjordlefse frå Håjen lefsebakeri i Naustdal.

Slettehaug meiner Kongehuset har eit godt auge for å bruke norsk mat og norske kokkar.

- Eg håpar dei kongelege ikkje let det vere med dette, men held fram å vise merksemd til lokale matspesialitetar, slik det britiske kongehuset gjer i England og Obama-familien har gjort i USA, seier Sletthaug.

FLAGGPYNTA: Det var 17. mai-stemning under Bondens marked i Førde fredag 9. juli i påventa av besøket frå Dronning Sonja med følgje. FOTO: Silje Grønnevik