YTRING: Fryktar total ubalanse i eggmarknaden

Rema 1000 kjøpte 50 prosent av aksjane i Hugaas Rugeri AS i sommar. No vil dei byggja heilt nytt eggpakkeri i Nord-Trøndelag, og er på jakt etter 100 nye eggprodusentar for å dekka etterspørselen til butikkjeda.

Eggprodusent Jostein Ljones i Kvam er provosert av den aggressive stilen til butikkjeda. Han ber gardbrukarar i regionen tenkja seg godt om før dei går i gang med å investera i eggproduksjon for Rema 1000.

Gigantisk overproduksjon

- Rema 1000 meiner alvor, ingen tvil om det, og dei kjem til å gjennomføra planane om eige pakkeri. Det gjer meg frykteleg uroleg og nervøs for heile eggsektoren, fordi dette på sikt kan resultera i ei gedigen overetablering og stor overproduksjon av egg, i mange år framover. 

I dag er det fritt fram å starta opp eggproduksjon, hvis ein har ein kontrakt med godkjent pakkeri.

- Alle nye eggprodusentar som kjem inn i næringa i dag, byggjer maks opp til konsesjonsgrensa, altså 7500 høner eller ca 130tonn per år, seier Ljones.

I 2008 var totalvolumet norskproduserte egg på 56000 tonn. Det er allereie prognosert stor overproduksjon fram mot 2012, men Ljones fryktar mange nye produsentar i Trøndelag kan resultera i ein yterlegare volumauke på 10-11 prosent. Me har då etablert varig overproduksjon på egg.

- Det betyr også meir i omsetningsavgift og store ekstrakostnader per produsent. Det er det ingen produsentar som har råd til!

Pressa bonden tilbake

Jostein Ljones er heilt klar på at det er ein kamp Rema 1000 no har starta. Ein kamp om marknadsmakt, og egg er berre starten på dette, meiner han.

- Det handlar om å ta mest mogeleg makt frå oss som produserer råvarene, kort sagt å pressa bonden tilbake i verdikjeda. Rema 1000 lovar lågast mogeleg pris til kunden, og det betyr at pris til produsent er lite prioritert, seier han og legg til:

- Det er enkelt å etablera seg med egg. Det er mottak og pakking, og så ut med varene igjen. For Rema 1000 er det eit klart mål å få deregulert resten av marknaden også. Dei har jo allereie meldt si interesse for å kjøpa eit nedlagt meieri!

Vil ta kontroll

Rema 1000 har som mål å svekka og helst fjerna heile landbrukssamvirket. Dei vil ha kontroll over heile verdikjeda, og utfordrar heile landbrukspolitikken her i landet, meiner egg- og melkeprodusenten i Hardanger. 

- Det er viktig å forstå at dette er kortsiktig. Når Rema snakker om lønsemd, er det snakk om eiga bedrift, og på sikt blir det vi som er bønder som blir dei store taparane.

Oppfordring til Nortura

Hvis ikkje Rema 1000 får nok kontraktar no, kan dei likevel kjøpa egg av Nortura, som er marknadsregulator, og komma i gang med pakkeri. På sikt kan dei fasa inn eigne produsentar.

Jostein Ljones meiner at Nortura no må styrkje dei eggprodusentane som skal produsera også etter 2012.

- Det haster med å få avklart kor mange av dagens leverandører som blir med vidare. I tillegg bør ein setja i verk tiltak som gjer at dei produsentane som ikkje skal vere med etter 2012 sluttar å produsera snarast mulig for å unngå overproduksjon og strekt prispress i markedet framover.

Jostein Ljones meiner gjeld å forsera omstillinga, og få på plass langsiktige leverandøravtalar snarast mogeleg.

- Det er avgjerande for økonomien til alle eggprodusentane at Nortura framleis klarer å handtera rolla si som markedsregulator.

Kva meiner du om saka? Skriv din kommentar nedanfor!