- Rovvilt i prioriterte beiteområde må takast ut

- Uttak er det mest effektive tiltaket for å redusera tapa, seier leiar i Norsk Sau og Geit, Ove Ommundsen.

I mange av landets rovviltregionar har det i sommar vore store tap av sau på beite. Jerv tek lam i større omfang enn tidlegare, og i stadig fleire beiteområde er det store tap både til jerv og bjørn i dei same buskapane.

I fleire regionar ligg bestandsnivået på jerv langt over bestandsmålet. Dette tilseier at det er behov for uttak av jerv i regi av Statens naturoppsyn, framheld Ove Ommundsen.

Saka vedrørande uttak av lisenskvote på bjørn og jerv er nyleg handsama i representantskapet i Norsk Sau og Geit.

På eit tidlegare tidspunkt

Stortinget har i det nye forliket sagt at miljøforvaltinga skal igangsetja uttak av jerv på eit tidlegare tidspunkt i samband med lisensperioden.

- Det nye rovviltforliket pålegg forvaltinga å syta for å fylla lisenskvotane for å halda bestandsmålet nede på vedteke nivå. Det er Direktoratet for naturforvalting som har forvaltingsmyndigheit og kan gje Statens naturoppsyn oppdrag om uttak av dyr som ikkje er tekne ut i samband med lisensfelling, seier Ommundsen.

Berre to bjørnar tekne i år

Ove Ommundsen slår fast at dokumentasjonskravet på lam drepne av jerv ikkje må vega for tungt, då ein kvar som har kjennskap til rovviltproblematikk veit at det er svært vanskeleg å finna og dokumentera kadaver etter jerv i beitesesongen.

Lisensjakta på bjørn er avslutta, med berre to bjørnar felt av ein kvote på 27 i heile landet. Desse to vart tekne i Tana i Finnmark og Målselv i Troms, begge i september.

- Sjølv med mange registrerte bjørnejegarar, er interessa laber for å jakta spesielt på bjørn i Norge. Det er opna for lisensjakt i område med lågast tettleik av bjørn.

- Me registrerer at Direktoratet for naturforvalting har opna for ekstraordinære uttak av bjørn i tre av fire aktuelle regionar. Med bakgrunn i 168 kadaver registrert tekne av bjørn, ville det vore aktuelt med uttak også i rovviltregion 6 - altså Trøndelag og Møre og Romsdal. I denne regionen er det registrert 138 kadaver innafor yngleområdet for bjørn. Me har grunn til å tru at Direktoratet for naturforvalting meiner dette er eit akseptabelt tap forårsaka av bjørn i region 6, etter som det ikkje vert opna for ekstraordinære uttak her, seier Ove Ommundsen.

Yngleområda

Tap av bufe drepne av bjørn er størst innafor yngleområda, der bjørnetettleiken er stor. I yngleområda er det ikkje opna for lisensjakt.

I yngleområde for bjørn kan det opnast for ekstraordinær skadefelling av hannbjørn for å minka risikoen for store tap av bufe og rein komande beitesesong. Det er stor overvekt av hannar i alle regionar så nær som i region 8, det vil seia Troms og Finnmark - og uttak av hanndyr vil kunna vera eit viktig bidrag til å minka konflikten mellom rovvilt og bufe/rein. Uttak på vårsnø vil vera ein sikker metode for å unngå å ta binner, fordi hannbjørn forlet hiet tidlegare, held Ommundsen fram.

Uttak av jerv

- Me krev uttak av jerv der det er størst tap av lam, og at det spesielt vert prioritert uttak av heile jervekvoten der det er store tap av lam i tillegg til store tap av vaksne på grunn av bjørn. Likeeins krev me at det vert igongsett førebyggjande skadefelling av bjørn innafor yngleområde i region 6 allereie i haust, og at det vert følgt opp vidare på vårsnøen for å realisera uttak når hannbjørnane forlet hiet. Rovviltet i våre beiteområde må forvaltast i høve til den todelte målsetjinga, seier styreleiar Ove Ommundsen i Norsk Sau og Geit.