Reagerer på ulik pris for like egg

Jon Line har saman med fleire andre eggprodusentar på Jæren og i Ryfylke skreve brev til Nortura. I brevet ber dei om ei forklaring på kvifor det er innført ulik avrekningspris på egg frå burhøns.

Line er lite nøgd med svaret han har fått frå Nortura. Dei meiner prissetjinga som er gjennomført er gjort for å sikra økonomisk grunnlag for vidare omstilling i eggproduksjonen. Ei prioritering av omstilte produksjonsformer skal sikre den langsiktige marknadsbalansen på egg økonomisk

- Ei rein skvising

- Eg synest Nortura vrir seg unna heile problemstillinga, og svaret deira er på ingen måte oppklarande. Saken er at dei betaler ulik pris for den same vara. Det gjer det økonomisk vanskeleg for oss som har gamle buranlegg, seier Line og legg til:

- Begge desse burtypane er godkjende fram til 31. desember 2012, og egga blir selt ut igjen til den same prisen. Dette er etter mi meining ei rein skvising av oss som har gamle buranlegg.

Nortura meiner at produsentar med tradisjonelle bur er på slutten av ein investeringsfase med lågare kapitalkostnader. Er du samd i dette?

- Nei, det er eg ikkje. Eg har framleis mykje gjeld på huset eg bygde i 2002. Med 50 prosent større konsesjon no, enn det var den gang, kan det ikkje vera så store skilnader.

Varsla om ombygging

Jon Line er mjølk- og eggprodusent på Bryne i Time kommune. Han driv mjølkeproduksjon i samdrift med to andre, og kvoten er på 418 000 liter. Line bygde nytt hønsehus til 5.000 høner i 2002. Det var til maks grense den gang. Like etterpå vart konsesjonsgrensa utvida.

- Eg bygde med tanke på ei eventuell ombygging seinare. Derfor har eg no plass til 5.760 høner. Eg har for fleire år sidan varsla Nortura om at eg planlegg ei ombygging til frittgåande høner, og derfor føler eg meg rett og slett svikta av samvirke som eggprodusent.

Ivrig samvirkemann

Jon Line har alltid vore samvirkepatriot. Han er det framleis, men no røyner det på i forhold til Nortura, innrømmer han.

- Eg vil gjerne vera bonde på heiltid, og då kan eg ikkje berre slutta med eggproduksjon utan vidare. Slik det er no, føler eg eit press på å gi meg med egg. Det kjem eg ikkje til å gjera, men om det blir å levere vidare til Nortura, er meir usikkert, seier han.

Melka går til Tine. Han meiner det er store kulturskilnader mellom dei to samvirkebedriftene.

- Eg føler me blir meir høyrt og tekne på alvor i Tine. Det er klart at Nortura har vore gjennom store omveltingar og framleis har store utfordringar, men det er viktig at me som produsentar og eigarar blir involverte og møtt med ei open innstilling.